«Саутгемптон» бош мураббийи Тонда Эккерт Англия Кубоги чорак финалида Лондоннинг «Арсенал» жамоаси устидан қозонилган кутилмаган ғалабадан (2:1) сўнг ўз фикрларини билдирди.

«Авлиёлар» Шей Чарльзнинг 85-дақиқада киритган голи эвазига Премьер-лиганинг амалдаги пешқадамини мағлуб этишди.

«Бу ўзига хос оқшом. Бизни нима кутаётганини билардик, аммо айрим вазиятларда тўпга эгалик қилишни уддаладик. Бундай рақибга қарши баҳсда бу жуда қадрли. Ўйлайманки, тўлиқ 90 дақиқалик ҳаракатларимиздан келиб чиқиб, ғалабага лойиқ эдик.

Ҳар бир ўйин — алоҳида тарих: баъзида тўпга 70% эгалик қилиб ғалаба йўлини топиш керак, баъзида эса тезкор ўтишлар ва стандарт вазиятларга урғу бериш тўғри бўлади. Биз турли услубларда ғалаба қозона олишимизни исботладик», — дея 33 ёшли мутахассис сўзларидан иқтибос келтиради BBC.

«Саутгемптон» айни дамда Чемпионшип турнир жадвалида еттинчи ўринни эгаллаб турибди.