Braziliya terma jamoasi va Kataloniyaning «Barselona» klubi sobiq futbolchisi Ronaldinyo «ko‘k-anorranglilar»ning 18 yoshli vingeri Lamin Yamal ko‘rsatayotgan o‘yin darajasi haqida o‘z fikrini bildirdi.

«Lamin hozirda dunyoning eng yaxshi futbolchilaridan biri hisoblanadi. U bunday yosh bo‘lishiga qaramay, aql bovar qilmaydigan o‘yin namoyish etmoqda. O‘ylaymanki, 10-raqam ishonchli qo‘llarda. «Barsa» hamon dunyoning eng kuchli jamoalaridan biri bo‘lib qolmoqda», — deya afsonaviy braziliyalikning so‘zlarini keltirmoqda Ole nashri.

Eslatib o‘tamiz, o‘tgan yili Yamal «Oltin to‘p» so‘rovnomasida ikkinchi o‘rinni egallagan edi.

Joriy mavsumda ispaniyalik vinger 41 ta uchrashuvda maydonga tushdi. Lamin o‘z hisobiga 21 ta gol va 15 ta golli uzatmani yozdirib qo‘yishga muvaffaq bo‘ldi.