Бразилия терма жамоаси ва Каталониянинг «Барселона» клуби собиқ футболчиси Роналдиньо «кўк-анорранглилар»нинг 18 ёшли вингери Ламин Ямал кўрсатаётган ўйин даражаси ҳақида ўз фикрини билдирди.

«Ламин ҳозирда дунёнинг энг яхши футболчиларидан бири ҳисобланади. У бундай ёш бўлишига қарамай, ақл бовар қилмайдиган ўйин намойиш этмоқда. Ўйлайманки, 10-рақам ишончли қўлларда. «Барса» ҳамон дунёнинг энг кучли жамоаларидан бири бўлиб қолмоқда», — дея афсонавий бразилияликнинг сўзларини келтирмоқда Ole нашри.

Эслатиб ўтамиз, ўтган йили Ямал «Олтин тўп» сўровномасида иккинчи ўринни эгаллаган эди.

Жорий мавсумда испаниялик вингер 41 та учрашувда майдонга тушди. Ламин ўз ҳисобига 21 та гол ва 15 та голли узатмани ёздириб қўйишга муваффақ бўлди.