Yarim himoyachi Bernardu Silva yaqinlashib kelayotgan yozda "Manchester Siti"ni erkin agent maqomida tark etadi. Portugaliyalik futbolchi uchun variantlardan biri — "Yuventus"ga o‘tish hisoblanadi.
La Gazzetta dello Sport nashrining xabar berishicha, "Yuventus" allaqachon futbolchining agenti Jorje Mendesh bilan aloqaga chiqqan. Turin klubi Silvaga yana bir mavsumga uzaytirish imkoniyati bilan uch yillik shartnoma taklif qilgan. Maosh miqdori yiliga 7-8 million yevroni tashkil etadi. Va bu portugaliyalik futbolchi avgust oyida 32 yoshga to‘lishiga qaramay taklif qilinmoqda.
Shu bilan birga, Bernardu Silvaga Yevropaning boshqa nufuzli klublari ham qiziqish bildirayotgani qayd etilgan. Avvalroq portugaliyalik futbolchining nomi "Barselona" va "PSJ" bilan bog‘langan edi.
