Dunyoning eng nufuzli nashrlaridan biri The Wall Street journal Nomzodlar turniridagi eng katta sensasiya sifatida aynan Sindarovga e’tibor qaratdi.

Maqolada 20 yoshli o‘zbekistonlik grossmeyster turnirda deyarli hammani ortda qoldirib, jahon chempionligi uchun asosiy da’vogarlardan biriga aylanayotgani ta’kidlangan.

Ayniqsa, Hikaru Nakamuraga qarshi partiya alohida qayd etiladi. U bir yurish ustida bir soatdan ortiq o‘ylab, oxirida xato qilgani va Sindarov buni sovuqqonlik bilan jazolagani yozilgan.

7 turdan keyin Sindarov 5 ta g‘alaba bilan Nomzodlar tarixidagi eng kuchli startlardan birini ko‘rsatgani ham alohida urg‘u bilan berilgan.

Hatto jahonning 1-raqamli shaxmatchisi Magnus Karlsen ham uning natijalaridan hayratda qolgani keltiriladi — bunday startni deyarli hech kim kutmagan edi.

Shuningdek, maqolada O‘zbekiston shaxmatining o‘sishi, yangi avlod paydo bo‘layotgani va Sindarov aynan shu “oltin avlod”ning eng yorqin vakillaridan biri ekani ham ta’kidlangan.

Xulosa shuki, Sindarov endi shunchaki iste’dod emas, balki jahon chempionligi uchun real da’vogar sifatida ko‘rilmoqda.