Shotlandiyalik himoyachi Endryu Robertson ijtimoiy tarmoqlardagi sahifasi orqali joriy mavsum yakunida «Liverpul»ni tark etishini e’lon qildi. Ushbu xabar klub muxlislari uchun haqiqiy emosional zarba bo‘ldi.

«Men bu klubdagi ajoyib lahzalarni doimo yodda saqlayman. To‘qqiz yil davomida bor vujudim bilan o‘ynadim va hech narsadan afsuslanmayman. Bu yerda inson va shaxs sifatida ulg‘aydim. «Liverpul» va uning muxlislari men uchun hamisha hamma narsa bo‘lib qoladi. Bu ajoyib sayohat edi.

Hozir bor e’tiborim mavsumni iloji boricha yaxshi yakunlashga qaratilgan. Umid qilamanki, muxlislarga yana bir nechta quvonchli lahzalarni taqdim eta olamiz. Mavsum tugayotganda esa, ehtimol, kameralar qarshisida yig‘lab yuborganimni ko‘rarsiz», — deb yozdi Robertson.

Futbolchi 2017 yildan beri klub safida to‘p tepmoqda. Bu davrda Robertson barcha musobaqalarda 373 ta o‘yinda maydonga tushib, 13 ta gol va 69 ta golli uzatmani amalga oshirdi.