Шотландиялик ҳимоячи Эндрю Робертсон ижтимоий тармоқлардаги саҳифаси орқали жорий мавсум якунида «Ливерпуль»ни тарк этишини эълон қилди. Ушбу хабар клуб мухлислари учун ҳақиқий эмоционал зарба бўлди.
«Мен бу клубдаги ажойиб лаҳзаларни доимо ёдда сақлайман. Тўққиз йил давомида бор вужудим билан ўйнадим ва ҳеч нарсадан афсусланмайман. Бу ерда инсон ва шахс сифатида улғайдим. «Ливерпуль» ва унинг мухлислари мен учун ҳамиша ҳамма нарса бўлиб қолади. Бу ажойиб саёҳат эди.
Ҳозир бор эътиборим мавсумни иложи борича яхши якунлашга қаратилган. Умид қиламанки, мухлисларга яна бир нечта қувончли лаҳзаларни тақдим эта оламиз. Мавсум тугаётганда эса, эҳтимол, камералар қаршисида йиғлаб юборганимни кўрарсиз», — деб ёзди Робертсон.
Футболчи 2017 йилдан бери клуб сафида тўп тепмоқда. Бу даврда Робертсон барча мусобақаларда 373 та ўйинда майдонга тушиб, 13 та гол ва 69 та голли узатмани амалга оширди.
