«Liverpul» sardori va himoyachisi Virdjil van Deyk Muhammad Saloh hamda Endryu Robertsonning joriy mavsum yakunida ingliz jamoasini tark etish qaroriga munosabat bildirdi.

«To‘qqiz yil... bu shunchaki bir fasl emas, bu butun bir davr. Shu vaqt ichida boshimizdan kechirgan barcha voqealar haqida o‘ylaganingda, bu shunchaki aql bovar qilmas darajada ekanini tushunasan. Biz har qanday yaxshi narsaning nihoyasi borligini bilamiz...

Yuksalish lahzalarida, bosim ostida, muhim daqiqalar va bayramlarda siz har bir qadamda yonimizda bo‘ldingiz. Biz birgalikda hamma narsada g‘olib chiqdik. Biroq sovrinlardan ham ko‘ra ko‘proq xotiralar, maydondagi janglar va bu yo‘ldagi quvonchli damlarni eslaymiz. Biz katta g‘alabalar va og‘ir mag‘lubiyatlarni birgalikda yengib o‘tdik. Nima bo‘lishidan qat’i nazar, hushtak chalinganda bir-birimizga tayanishimiz mumkinligini bilardik. Sizlar shunchaki jamoadosh emas, balki yetakchilar, aka-ukalar va eng muhim paytlarda suyanish mumkin bo‘lgan insonlar bo‘ldingiz.

Shuning uchun ham qilgan mehnatlaringiz, sadoqatingiz, kulgingiz va xotiralar uchun ikkingizga ham rahmat. Bizga hamma narsani yutishda yordam berganingiz va bu yo‘lni yanada go‘zal qilganingiz uchun tashakkur. Sizlar jamoadosh sifatida keldingiz, afsona sifatida ketmoqdasiz va eng muhimi — siz oilamizning bir a’zosi sifatida ketyapsiz», — deb yozdi van Deyk o‘zining ijtimoiy tarmoqdagi sahifasida.

Saloh va Robertson 2017 yildan beri «Liverpul» sharafini himoya qilib kelmoqda. Ushbu davr mobaynida 33 yoshli hujumchi barcha musobaqalarda 436 ta o‘yinda ishtirok etib, 255 ta gol va 122 ta golli uzatmaga mualliflik qildi. Himoyachi esa 373 ta uchrashuvda maydonga tushib, «gol+pas» tizimida 13+69 ochko jamg‘ardi.