«Chelsi» klubi «Shtutgart» yarim himoyachisi Angelo Shtillerning harakatlarini kuzatib bormoqda. Germaniya terma jamoasi a’zosi Bundesliganing 16-turi doirasida «shvablar» «Bayer»ni 4:1 hisobida mag‘lub etgan o‘yinda londonliklarda katta taassurot qoldirgan. Bu haqda Bild nashri xabar bermoqda.

Manba bergan ma’lumotga ko‘ra, «Shtutgart» 25 yoshli futbolchining transferini taxminan 50 mln yevroga baholamoqda. O‘tgan yozda «Manchester Yunayted» transfer oynasining so‘nggi pallasida yarim himoyachi bilan shartnoma imzolashga urinib ko‘rgan edi. Agar Shtiller APLga o‘tsa, uning maoshi kamida ikki baravar oshishi mumkin. Hozirgi kunda u yiliga 4,5 mln yevro maosh oladi.

Joriy mavsumda Shtiller barcha musobaqalarda 44 ta o‘yinda ishtirok etib, bitta gol va 10 ta golli uzatmaga mualliflik qildi. Futbolchining klub bilan amaldagi shartnomasi 2028 yil yozigacha mo‘ljallangan. Transfermarkt portali ma’lumotlariga ko‘ra, uning bozor qiymati 45 mln yevroni tashkil etadi.