Madridning «Real» klubi La Liga bahsida «Jirona»ni mag‘lub eta olmadi (1:1). So‘nggi vaqtlarda matbuotda Kilian Mbappe o‘zining yuksak individual mahoratiga qaramay, jamoani kuchaytirmayotgani, aksincha, o‘yinga disbalans olib kirayotgani haqidagi gap-so‘zlar yana avj oldi. Bu holat, ayniqsa, u Vinisius Junior bilan bir vaqtda maydonda bo‘lganida yaqqol ko‘zga tashlanmoqda.

Bu kabi muammolarni «Barselona» rahbari Joan Laporta oldindan ko‘ra bilgan edi. Ispaniyada kataloniyaliklar grandi prezidentining 2024 yilning mart oyida, ya’ni yulduz hujumchi Madridga kelishidan bir necha oy oldin Mbappening «Real»ga o‘tishi haqida aytgan fikrlarini yodga olishdi.

«Mbappe «Real»dami? Ularda muammolar yuzaga keladi. Ular kimnidir sotishlariga to‘g‘ri keladi, shunday emasmi? Ikki nafar muhim futbolchi bitta pozisiyada o‘ynay olmaydi. Shuningdek, bu transferdagi raqamlar kiyinish xonasidagi muhitga ham albatta ta’sir qiladi», — deya Laportaning «bashoratini» keltirmoqda Barca Universal.

Bugun «Barselona» chempionatdagi ochkolar farqini 9 tagacha yetkazib olishi mumkin.