Angliya terma jamoasi sobiq futbolchisi Ueyn Runi "Barselona"ning Chempionlar ligasi yarim finaliga chiqish imkoniyatlari haqida o‘z fikrlari bilan o‘rtoqlashdi.
"Quloq soling, odamlar "Barselona"ni hisobdan chiqarishmoqda, ammo ularga qarshi garov bog‘lasangiz, ahmoqlik qilgan bo‘lasiz. "Barselona" katta o‘yinlarda qanday harakat qilishni boshqalardan ko‘ra yaxshiroq biladi. Albatta, "Atletiko" — shakllanib bo‘lgan kuchli jamoa, lekin ular hech qachon Chempionlar ligasida g‘olib chiqishmagan. "Barsa"da esa o‘yinni o‘z tomoniga og‘dirish va hammaga o‘zlarining kimligini eslatib qo‘yish uchun kerakli DNK mavjud", — deya Runining so‘zlarini keltiradi Barca Scoop nashri.
Eslatib o‘tamiz, Chempionlar ligasi chorak finalining dastlabki uchrashuvida "Barselona" o‘z maydonida "Atletiko"ga 0:2 hisobida imkoniyatni boy bergan edi. O‘sha bahsning butun ikkinchi bo‘limi davomida kataloniyaliklar bir kishi kam bo‘lib o‘ynashgan.
Javob uchrashuvi 14 aprel kuni bo‘lib o‘tadi. O‘yin Toshkent vaqti bilan soat 00:00 da boshlanishi rejalashtirilgan.
