Londonning "Arsenal" jamoasi bosh murabbiyi Mikel Arteta Angliya Premyer-ligasi 32-turida "Bornmut"ga qarshi kutilmagan mag‘lubiyatdan (1:2) so‘ng muxlislarga murojaat qildi.

«Uzr so‘rash, buni qabul qilish va oldinga intilish — hammasi shu. Men klub uchun qo‘limdan kelgan barcha ishni qilishga, o‘yinchilar uchun eng yaxshi sharoitlarni yaratishga harakat qilaman. Va bilamanki, agar stadiondagi muhit, muxlislar, qo‘llab-quvvatlash va energiya dunyodagi eng yaxshisi bo‘lsa, bizning imkoniyatlarimiz ancha oshadi. Bunday qo‘llab-quvvatlash bilan o‘ynashdan yaxshiroq usul bor, deb o‘ylamayman. Lekin biz ham javob qaytarishimiz kerak.

Birinchi bo‘limda buni uddalagan paytlarimiz bo‘ldi, ammo ayrim daqiqalarda o‘z darajamizni ko‘rsata olmadik. Shuning uchun muxlislardan uzr so‘rashimiz va albatta, o‘yinimizni yaxshilashimiz kerak», — deya Arteta so‘zlarini klub rasmiy sayti keltiradi.

Hozirgi holatga ko‘ra, «Arsenal» 70 ochko bilan turnir jadvalida peshqadam bo‘lib turibdi. «Bornmut» 45 ochko bilan 9-o‘ringa ko‘tarildi. Ikkinchi o‘rinda "Manchester Siti" (61 ochko) bormoqda.