«An-Nasr» Saudiya Arabistoni chempionatida g‘olib chiqishga astoydil bel bog‘lagan. Shanba oqshomida Jorje Jezush shogirdlari o‘z maqsadlari yo‘lida navbatdagi qadamni tashlashdi — safarda «Al-Axdud» jamoasi 2:0 hisobida mag‘lub etildi. Gollarga Krishtianu Ronaldu va Joau Felish mualliflik qilishdi.
Shuni ta’kidlash joizki, «An-Nasr» Saudiya Pro-ligasida ketma-ket 14 ta o‘yindan beri g‘alaba qozonib kelmoqda. Bu juda hayratlanarli seriya. E’tiborlisi, jamoa yulduzi Ronaldu ushbu 14 ta uchrashuvning 4 tasini o‘tkazib yuborgan.
Ayni damda «An-Nasr» turnir jadvalida peshqadamlik qilmoqda va ikkinchi o‘rindagi «Al-Hilol»ni besh ochkoga ortda qoldiryapti. Chempionat yakunigacha yana oltita tur qoldi.
Ma’lumot uchun, «An-Nasr» oxirgi marta 2018/2019 yilgi mavsumda Saudiya Arabistoni chempioni bo‘lgan edi.
