«Ан-Наср» Саудия Арабистони чемпионатида ғолиб чиқишга астойдил бел боғлаган. Шанба оқшомида Жорже Жезуш шогирдлари ўз мақсадлари йўлида навбатдаги қадамни ташлашди — сафарда «Ал-Ахдуд» жамоаси 2:0 ҳисобида мағлуб этилди. Голларга Криштиану Роналду ва Жоау Фелиш муаллифлик қилишди.

Шуни таъкидлаш жоизки, «Ан-Наср» Саудия Про-лигасида кетма-кет 14 та ўйиндан бери ғалаба қозониб келмоқда. Бу жуда ҳайратланарли серия. Эътиборлиси, жамоа юлдузи Роналду ушбу 14 та учрашувнинг 4 тасини ўтказиб юборган.

Айни дамда «Ан-Наср» турнир жадвалида пешқадамлик қилмоқда ва иккинчи ўриндаги «Ал-Ҳилол»ни беш очкога ортда қолдиряпти. Чемпионат якунигача яна олтита тур қолди.

Маълумот учун, «Ан-Наср» охирги марта 2018/2019 йилги мавсумда Саудия Арабистони чемпиони бўлган эди.