«Manchester Siti» ustozi Xosep Gvardiola joriy mavsumning dastlabki xulosalarini chiqardi.
Bugun «shaharliklar» Premyer-liga jadvalida «Arsenal» bilan o‘rtadagi farqni olti ochkogacha qisqartirishlari mumkin — buning uchun Londonda «Chelsi» ustidan g‘alaba qozonish talab etiladi. Keyingi turda esa «Siti» o‘z maydonida «to‘pchilar»ni qabul qiladi.
«Bu mavsumda biz eng yaxshi darajamizda o‘yin ko‘rsata olmayapmiz, biroq tarkibimiz sezilarli darajada o‘zgardi, ko‘plab yangi o‘yinchilar keldi — biz kelajak uchun jamoa qurmoqdamiz. Keyinchalik biz yanada kuchayamiz va Premyer-liga chempionligi uchun kurashni davom ettiramiz», — dedi Gvardiola matbuot anjumanida.
Mish-mishlarga ko‘ra, ispaniyalik murabbiyning shartnomasi keyingi mavsum oxirigacha amal qilsa-da, u kelayotgan yozda lavozimini tark etishi mumkin.
