«Real» hujumchisi Kilian Mbappe yakshanba kuni maydondagi mashg‘ulotlarda ishtirok etmadi. Madrid klubi rasmiy saytida Mbappening qoshi ustiga chok qo‘yilgani sababli mashg‘ulotlarni o‘tkazib yuborgani haqida ma’lumot berildi.
«Mbappe noqulaylik sezgani va ehtiyot chorasi sifatida maydonga tusha olmadi», — deyiladi klub xabarida.
Ijtimoiy tarmoqlardagi sahifasida Mbappe qoshi ustiga qo‘yilgan choklar aks etgan suratni e’lon qildi. Fransiyalik futbolchi o‘tgan o‘yindagi to‘qnashuv natijasida jarohat olgan edi.
Eslatib o‘tamiz, juma kuni «Real» o‘z maydonida «Jirona»ni mag‘lub eta olmadi — La Liga doirasidagi bahs 1:1 hisobida yakunlandi. «Barselona» esa «qaymoqranglilar»ning ushbu xatosidan unumli foydalanib, oradagi farqni to‘qqiz ochkogacha oshirib oldi.
