Italiyaning «Komo» klubi «Inter»ga qarshi o‘ta hayajonli o‘yin o‘tkazdi. Sesk Fabregas shogirdlari bahs davomida ikkita to‘p farqi bilan oldinda borayotgan edilar, biroq yakunda nafaqat g‘alabani, balki durangni ham qo‘ldan chiqarishdi.

Ma’lum bo‘lishicha, «Komo» shu paytgacha Italiya chempionati doirasida ikkita to‘p farqi bilan oldinda borgan biror bir o‘yinida mag‘lub bo‘lmagan edi. Ushbu mag‘lubiyat klub tarixida mutlaq «premyera»ga aylandi.

Shuni ta’kidlash joizki, klubni A Seriyada tajribasiz deb bo‘lmaydi — jamoa hozirgi davrdan tashqari, o‘tgan asrning 50 va 80-yillarida ham Italiya yuqori divizionida muntazam ishtirok etgan.

Ayni damda Sesk Fabregas jamoasi A Seriya turnir jadvalida beshinchi o‘rinni egallab turibdi.