Италиянинг «Комо» клуби «Интер»га қарши ўта ҳаяжонли ўйин ўтказди. Сеск Фабрегас шогирдлари баҳс давомида иккита тўп фарқи билан олдинда бораётган эдилар, бироқ якунда нафақат ғалабани, балки дурангни ҳам қўлдан чиқаришди.

Маълум бўлишича, «Комо» шу пайтгача Италия чемпионати доирасида иккита тўп фарқи билан олдинда борган бирор бир ўйинида мағлуб бўлмаган эди. Ушбу мағлубият клуб тарихида мутлақ «премьера»га айланди.

Шуни таъкидлаш жоизки, клубни А Серияда тажрибасиз деб бўлмайди — жамоа ҳозирги даврдан ташқари, ўтган асрнинг 50 ва 80-йилларида ҳам Италия юқори дивизионида мунтазам иштирок этган.

Айни дамда Сеск Фабрегас жамоаси А Серия турнир жадвалида бешинчи ўринни эгаллаб турибди.