«Manchester Siti» bosh murabbiyi Xosep Gvardiola hujumkor yarim himoyachi Rayan Sherkining o‘yini haqida fikr bildirdi.

22 yoshli futbolchi yakshanba kuni Premyer-liga doirasida kechgan «Chelsi»ga qarshi bahsda (3:0) ikkita golli uzatmani amalga oshirib, «shaharliklar»ning g‘alabasiga munosib hissa qo‘shdi.

«Sherki APLdagi ilk mavsumidayoq hayratlanarli statistika qayd etmoqda, u juda iqtidorli. Bu noyob holat. Ota-onasi unga katta iste’dod berishgan, ammo bu — oldingi chiziqda, Xolandga yaqinroq o‘ynash uchun berilgan talant. U esa ba’zida Donnarummaning yoniga tushib ketmoqda, bu mutlaqo mantiqsiz. Birinchi bo‘limda Rayan nima qildi? U mening yonimda yurgandi! Oldinga bor, Xolandning, vingerlarning va hujumkor yarim himoyachilarning yoniga — tabiiy iqtidoringdan foydalan! Agar u shuni o‘zlashtirib olsa, buyuk futbolchiga aylanadi», — deya Gvardiolaning so‘zlarini keltirmoqda City Report.

Rayan Sherki o‘tgan yilning yozida «Lion» klubidan «Manchester Siti»ga o‘tgan edi.