«Манчестер Сити» бош мураббийи Хосеп Гвардиола ҳужумкор ярим ҳимоячи Райан Шеркининг ўйини ҳақида фикр билдирди.

22 ёшли футболчи якшанба куни Премьер-лига доирасида кечган «Челси»га қарши баҳсда (3:0) иккита голли узатмани амалга ошириб, «шаҳарликлар»нинг ғалабасига муносиб ҳисса қўшди.

«Шерки АПЛдаги илк мавсумидаёқ ҳайратланарли статистика қайд этмоқда, у жуда иқтидорли. Бу ноёб ҳолат. Ота-онаси унга катта истеъдод беришган, аммо бу — олдинги чизиқда, Холандга яқинроқ ўйнаш учун берилган талант. У эса баъзида Доннарумманинг ёнига тушиб кетмоқда, бу мутлақо мантиқсиз. Биринчи бўлимда Райан нима қилди? У менинг ёнимда юрганди! Олдинга бор, Холанднинг, вингерларнинг ва ҳужумкор ярим ҳимоячиларнинг ёнига — табиий иқтидорингдан фойдалан! Агар у шуни ўзлаштириб олса, буюк футболчига айланади», — дея Гвардиоланинг сўзларини келтирмоқда City Report.

Райан Шерки ўтган йилнинг ёзида «Лион» клубидан «Манчестер Сити»га ўтган эди.