«Liverpul» bosh murabbiyi Arne Slot Chempionlar ligasi 1/4 finali doirasidagi «PSJ»ga qarshi javob o‘yini oldidan o‘z fikrlarini bildirdi. Parijda kechgan dastlabki bahsda mersisaydliklar 0:2 hisobida imkoniyatni boy berishgan edi.

«Avvalo, men futbolchilarga hisob 0:2 ekanligini eslatdim. Taassurotlar bundan ham yomonroq edi, lekin aslida biz 0:2 hisobida yutqazdik. Ikkinchidan, joriy mavsumdagi yirik o‘yinlarda biz allaqachon ajoyib o‘yinlar namoyish etdik. Boshqacharoq o‘tgan bahslar ham bo‘ldi, buni tushunaman, lekin yaxshilari ham yetarli edi. Ayniqsa, katta to‘qnashuvlar.

Mening qo‘l ostimda o‘tkazilgan 49 ta uy uchrashuvining 36 tasida biz ikkita yoki undan ko‘p gol urdik. To‘g‘ri, biz har doim ham «PSJ»ga qarshi o‘ynamaganmiz, buni anglab turibman, lekin raqiblarimiz orasida kuchli jamoalar ko‘p edi. Shunday ekan, ertaga qandaydir favqulodda natija ko‘rsata olishimizga ishonch bor. Biz Chempionlar ligasining amaldagi g‘olibiga qarshi maydonga tushamiz. Vazifa qiyin, lekin imkonsiz emas», — dedi Slot jurnalistlarga.