«Liverpul» klubi sobiq himoyachisi Jeymi Karrager «Arsenal» futbolchilari mavsumning hal qiluvchi pallasidagi bosimga bardosh bera olishi va Angliya chempionatidagi peshqadamlikni saqlab qolishiga shubha bildirdi.

«Hozirda «Arsenal» chempion bo‘lishdan ko‘ra, birinchi o‘rinni boy berib qo‘yishi ehtimoli yuqoriroqdek tuyulmoqda. Marra chizig‘i yaqinlashgani sari ulardagi asabiylik yaqqol ko‘zga tashlanmoqda. Jamoa muhim pallalarda ochko yo‘qotganda, ular amalda «Manchester Siti»ga poygaga qaytish uchun imkoniyat taqdim etadi. «Siti» maqsad yaqinligini sezishi bilan yanada kuchliroq harakat qila boshlaydi. Bu jamoa yaqin orada ochko yo‘qotish niyatida emas. Hozir «Arsenal»ga bo‘lgan bosim juda yuqori va bu kuchlar nisbati o‘zgarganini ko‘rsatmoqda», — deya Karragerning so‘zlarini keltiradi Sky Sports.

32-turdan so‘ng «Arsenal» 70 ochko bilan turnir jadvalida peshqadamlik qilmoqda. «Manchester Siti» hisobida esa 64 ochko bor va ularda bitta zaxira o‘yini mavjud. Navbatdagi turda ushbu klublar o‘zaro to‘qnash keladilar.