«Barselona» seshanba kuni Chempionlar ligasi 1/4 finalining javob uchrashuvi doirasida «Atletiko» mehmoni bo‘ladi. Kataloniyaliklar oldida qiyin vazifa turibdi — o‘z uylarida qabul qilingan 0:2 hisobidagi mag‘lubiyatdan so‘ng vaziyatni o‘nglashlari kerak. Mundo Deportivo nashrining xabar berishicha, vinger Rafinya seshanba kuni Madridda «Barselona» jamoasiga qo‘shilishi kutilmoqda. Braziliyalik futbolchi maydonga tusha olmaydi — u hali ham jarohatidan tiklanish jarayonida — biroq u jamoa safida bo‘lishni va yetakchi sifatida sheriklarini qo‘llab-quvvatlashni istaydi.
Eslatib o‘tamiz, Rafinya shu yilning mart oyida Braziliya terma jamoasi ixtiyorida bo‘lgan vaqtida jarohat olgan edi. Uning safga qaytishi may oyida kutilmoqda.
«Atletiko» va «Barselona» o‘rtasidagi bahs seshanba kuni, 14 aprel sanasida bo‘lib o‘tadi.
