Yaqinda Berlinning «Union» klubi matbuot xizmati yangi murabbiy tayinlanganini e’lon qildi — jamoani 34 yoshli Mari-Luize Eta o‘z qo‘liga oldi. Yevropaning kuchli beshlik ligalari tarixidagi ilk ayol bosh murabbiy haqidagi xabarga taniqli nemis sobiq futbolchisi Lotar Matteus munosabat bildirdi.
«2026 yilda jamoani erkak kishi boshqaradimi yoki ayolmi — buning umuman ahamiyati yo‘q. Klub Etaga ishonch bildirmoqda, u klubni ichidan biladi va allaqachon jamoa bilan juda yaqin aloqada», — deya ekspertning so‘zlarini keltirmoqda Sky Sport.
Ayni damda «Union» Bundesliga turnir jadvalida 32 ochko bilan 11-o‘rinni egallab turibdi. 18 aprel kuni Germaniya poytaxti klubi chempionatning 30-turi doirasida o‘z maydonida «Volfsburg»ni qabul qiladi.













