Яқинда Берлиннинг «Унион» клуби матбуот хизмати янги мураббий тайинланганини эълон қилди — жамоани 34 ёшли Мари-Луизе Эта ўз қўлига олди. Европанинг кучли бешлик лигалари тарихидаги илк аёл бош мураббий ҳақидаги хабарга таниқли немис собиқ футболчиси Лотар Маттеус муносабат билдирди.
«2026 йилда жамоани эркак киши бошқарадими ёки аёлми — бунинг умуман аҳамияти йўқ. Клуб Этага ишонч билдирмоқда, у клубни ичидан билади ва аллақачон жамоа билан жуда яқин алоқада», — дея экспертнинг сўзларини келтирмоқда Sky Sport.
Айни дамда «Унион» Бундеслига турнир жадвалида 32 очко билан 11-ўринни эгаллаб турибди. 18 апрель куни Германия пойтахти клуби чемпионатнинг 30-тури доирасида ўз майдонида «Вольфсбург»ни қабул қилади.
