«Bavariya» posboni Manuel Noyer Chempionlar Ligasining «Real Madrid»ga qarshi javob o‘yini oldidan o‘z maqomi haqidagi savolga javob berdi.

«Men tarixdagi eng buyuk darvozabonmanmi? Buni aytish qiyin — hammasi qaysi davr haqida gapirayotganimizga bog‘liq. Top-darajadagi darvozabonlar juda ko‘p. So‘nggi o‘n yilliklarda kamida 10 ta shunday futbolchini sanash mumkin. Har birining o‘z uslubi bor.

Ertaga Tibo Kurtuaning bunday muhim o‘yinni o‘tkazib yuborishi juda afsuslanarli. O‘tmishda ham Shmeyxel, Kan, Kasilyas, Buffon kabi afsonalar bo‘lgan. Hozir esa Kurtua bor. Juda ko‘p kuchli darvozabonlar o‘tgan va har birining o‘z kuchli tomonlari bo‘lgan. Kim eng yaxshi ekanligini aytish murakkab», — dedi Noyer.

Eslatib o‘tamiz, «Real»ga qarshi Madridda kechgan dastlabki bahsda 40 yoshli Noyer 9 ta seyv ijro etib, jamoasining g‘alabasiga (2:1) ulkan hissa qo‘shgan edi. Ertaga Myunxenda uni yana bir katta sinov kutmoqda.

O‘yin ertaga, 15 aprel kuni Toshkent vaqti bilan tungi soat 00:00 da boshlanadi.