"Atletiko" posboni Xuan Musso Chempionlar Ligasidan chiqib ketganidan so‘ng hakamlikni tanqid qilgan "Barselona" vingeri Rafinyaning so‘zlariga munosabat bildirdi.

Eslatib o‘tamiz, "Atletiko" ikki o‘yin natijasiga ko‘ra (2:0, 1:2) "Barselona"ni musobaqadan chiqarib yubordi.

"Ularning gaplarini eshitsangiz, go‘yoki "Barsa" foydasiga uchta penalti belgilanmagan va ularga to‘rtta qizil kartochka berilmagandek taassurot uyg‘onadi. "O‘g‘irlik" haqida gapirish noo‘rin.

Men Rafinya nima demoqchi ekanligini tushunaman, boshqa har qanday odam nima deyishi mumkinligini ham tushunaman — men har bir fikrni hurmat qilaman. Ammo keling, "o‘g‘irlik" haqida gapirmaylik, chunki bundan hech kimga yengil bo‘lib qolmaydi. Biz maydonda g‘alaba qozondik, ularni o‘z uylarida 2:0 hisobida mag‘lub etdik", — dedi Musso.