«Barselona» hujumchisi Rafinya UEFA Chempionlar Ligasi 1/4 final javob uchrashuvidan so‘ng «Atletiko» muxlislariga qarata qilgan harakatlari uchun kechirim so‘radi. O‘yin yakunlangach, braziliyalik futbolchi madridliklar muxlislariga ularning jamoasi yarim final bosqichida musobaqani tark etishini ko‘rsatgan edi.
«Qilgan ishim uchun uzr so‘rayman, bu mening qadriyatlarim va xarakterimga to‘g‘ri kelmaydi. Bu voqea kecha oqshom menga nisbatan hurmatsizlik qilgan muxlisga javob qaytargan vaqtimdagi hayajonli vaziyatda yuz berdi», — deb yozdi Rafinya DAZN kanalidagi video ostida qoldirgan izohida.
«Atletiko»ning yarim finaldagi raqibi bugun, 15 aprel kuni aniqlanadi. 1/4 final javob bahsida «Arsenal» va «Sporting» to‘qnash kelishadi. Birinchi o‘yin «kanonirlar»ning g‘alabasi bilan yakunlangan (1:0).
