Kelasi mavsumdan boshlab UYEFA klublar o‘rtasidagi turnirlar (Evropa Chempionlar Ligasi, Yevropa Ligasi va Konferensiyalar Ligasi) homiylik paketlaridan rekord darajadagi foyda olishni rejalashtirmoqda. Bu haqda The Guardian nashri xabar berdi.

UYEFA daromadlarining 40 foizdan ko‘proqqa o‘sishi global hamkorlar ro‘yxatining kengayishi va savdo tizimining butunlay yangilangani bilan bog‘liq. Amerikaning Relevent agentligi bilan hamkorlikda ishlab chiqilgan yangi modelga ko‘ra, endilikda hamkorlar faqat bitta turnirga emas, balki barcha uchta musobaqani (mavsumiga 531 ta o‘yin) qamrab oluvchi maxsus dasturlarga kirish imkoniga ega bo‘ladilar.

Homiylik bozorida allaqachon bir qator o‘zgarishlar amalga oshirildi:

Yangi global hamkorlar: AB InBev va Pepsi kompaniyalari bilan olti yillik yirik shartnomalar imzolandi.

Inventar yangilanishi: Nike kompaniyasi musobaqalarga rasmiy to‘p yetkazib beruvchi sifatida Adidas o‘rnini egallash bo‘yicha eksklyuziv muzokaralar olib bormoqda.

Kutilayotgan daromad: Yakuniy bosqichda turgan yana ikki shartnoma tashkilotga kamida 250 million yevro sof foyda keltirishi kutilmoqda.

Telehuquqlar (yiliga 5 milliard yevro) va yangi homiylik mablag‘lari hisobiga UYEFAning yillik umumiy tushumi hozirgi 4,4 milliarddan 6 milliard yevrogacha ko‘tarilishi kutilmoqda. Bu esa o‘z navbatida ishtirokchi klublarga to‘lanadigan mukofot pullari miqdorini sezilarli darajada oshiradi.

Hozirgi tizimga ko‘ra, turnirlar daromadining asosiy qismi (74 foiz) Yevropa Chempionlar Ligasi jamoalariga taqsimlanadi. Yevropa Ligasi klublari 17 foiz, Konferensiyalar Ligasi ishtirokchilari esa 9 foiz ulushga ega.