Javohir Sindarovning murabbiyi Roman Vidonyak uning Nomzodlar turniridagi g‘alabasidan keyin o‘z fikrlari bilan bo‘lishdi.

— “Bu hali eng katta natija emas. Biz rejamizdagi to‘rt bosqichdan ikkinchisinigina yakunladik.

Birinchisi Nomzodlar turniriga chiqish edi. Ikkinchisi esa uni yutish. Buni uddaladik. Endi navbat uchinchi bosqichga — jahon chempionligi uchun matchga.

Eng qiyini esa to‘rtinchi bosqich bo‘ladi: 2800 darajasiga chiqib, turnirlarda doimiy ustunlik qilish. Buni o‘z vaqtida Garri Kasparov va Magnus Karlsen qilgan”.

Vidonyakning aytishicha, bu darajaga chiqish uchun vaqt kerak:

— “Buning uchun kamida ikki yil jiddiy ishlashimiz kerak bo‘ladi. Ular (Kasparov va Karlsen) bu yoshda allaqachon tayyor edi, biz esa hali ham ustimizda ishlayapmiz”.

U tayyorgarlik jarayoniga ham to‘xtaldi:

— “Bir yil ichida to‘qqizta yig‘in o‘tkazdik. Ular asosan Myunxenda bo‘lib, har biri 10–14 kun davom etadi”.

Shuningdek, biz odatda kompyutersiz, shaxmat taxtasi oldida ishlaymiz. Turli mavzular bo‘yicha tizimli tarzda men tuzgan 40 mingga yaqin mashqlarni bajaramiz. Maqsad — o‘yinchining fikrlashini rivojlantirish,” — deya tushuntirdi Vidonyak.