Xalqaro futbol federasiyasi (FIFA) prezidenti Janni Infantino Eron terma jamoasi futbolchilari 2026 yilgi jahon chempionatida ishtirok etishni xohlayotganiga ishonchi komil ekanini ta’kidladi.
«Eron jamoasi albatta keladi. Biz, albatta, o‘sha vaqtgacha vaziyat tinchlanishiga umid qilamiz, bu shubhasiz yordam beradi. Ammo Eron kelishi shart. Ular o‘z xalqini ifoda etadilar. Ular saralashdan o‘tishdi. Futbolchilar o‘ynashni xohlashadi. Men ikki hafta oldin ularning oldiga bordim, ular Antaliyada o‘quv-mashg‘ulot yig‘inini o‘tkazishayotgan edi va ular haqiqatan ham maydonga tushishni istashmoqda. Ular o‘ynashlari kerak — sport siyosatdan tashqarida bo‘lishi lozim.
To‘g‘ri, biz Oyda yashamayapmiz, Yer sayyorasida yashayapmiz, lekin agar bizdan boshqa hech kim ko‘priklar qurishga va ularning yaxlitligi hamda birligini saqlashga ishonmasa, unda bu ish bilan biz shug‘ullanamiz», — deya Infantinoning so‘zlarini keltiradi ESPN nashri.
