Londonning «Arsenal» klubi ikki o‘yin natijasiga ko‘ra Lissabonning «Sporting» jamoasidan ustun kelib, Chempionlar ligasi yarim finaliga yo‘l oldi. «Kanonirlar» o‘tgan hafta Portugaliyada g‘alaba qozonishgan edi (1:0), o‘z uylarida esa golsiz durang (0:0) qayd etib, kerakli natijani saqlab qolishdi.

«Biz bejizga Chempionlar ligasi yarim finalidagi yagona Angliya jamoasiga aylanganimiz yo‘q. Ha, biz ideal emasdik, hali ustida ishlaydigan jihatlarimiz bor, lekin futbolchilarimiz erishgan natijani qadrlashimiz kerak», — deya «Arsenal» bosh murabbiyi Mikel Artetaning so‘zlarini keltirmoqda jurnalist Fabrisio Romano.

Yevropaning eng nufuzli klublar turniri yarim finalida London grandi Madridning «Atletiko» klubi bilan to‘qnash keladi. Uchrashuvlar 29 aprel va 5 may kunlari bo‘lib o‘tadi.