«Biz qaytdik» — hozirda «Koventri» klubining barcha resurslarida mana shunday xabarni ko‘rish mumkin. «Blekbern» bilan durang o‘ynagan (1:1) jamoa Premyer-liga yo‘llanmasini naqd qildi. Matematik jihatdan «Koventri» endi Chempionship turnir jadvalida ikkinchi o‘rindan pastga tushib ketmaydi.

«Koventri» bosh murabbiyi — «Chelsi»ning yuragi va sobiq dispetcheri Frenk Lemparddir. U o‘tgan yili ham jamoani Premyer-ligaga olib chiqishga harakat qilgan edi. O‘shanda «osmon-ranglilar» pley-offda ishtirok etishgan, biroq yarim finalda «Sanderlend»ga imkoniyatni boy berishgandi.

Shunday qilib, «Koventri Siti» 25 yillik tanaffusdan so‘ng Premyer-ligaga qaytmoqda — jamoa oxirgi marta 2000/2001 yilgi mavsum yakunlariga ko‘ra elitani tark etgan edi.