«Liverpul» bosh murabbiyi Arne Slotning fikricha, joriy mavsumda uning jamoasi g‘ayritabiiy omadsizlikka duch kelmoqda. «Qizillar» ayni damda Premyer-liga turnir jadvalida beshinchi o‘rinni egallab turibdi. Shanba kuni 33-tur doirasida «Everton»ga qarshi derbi bo‘lib o‘tadi.
«Biz qo‘shib berilgan vaqtlarda shunchalik ko‘p gol o‘tkazib yuboradigan yana bir mavsumni tasavvur qilish mumkinmi? Yo‘q, menimcha, buning iloji yo‘q — agar o‘sha gollar bo‘lmaganida, hozir hisobimizda yana qo‘shimcha olti, yetti yoki sakkiz ochko bo‘lardi. Shu qadar ko‘p jarohatlar kuzatiladigan mavsumni takrorlanishi mumkinmi? Buni inkor etib bo‘lmaydi, lekin umuman olganda, bizga bunchalik omad kulib boqmagan mavsum yana qaytarilishi haqida o‘ylash reallikdan yiroq», — dedi Slot matbuot anjumanida.
