Madridning “Real” klubi himoyachisi Raul Asensio sog‘lig‘idagi jiddiy muammolar sababli bir necha o‘yinni o‘tkazib yuborishga majbur bo‘lmoqda. Marca nashri xabariga ko‘ra, futbolchi gastroenterit (oshqozon-ichak yallig‘lanishi) oqibatida so‘nggi ikki hafta ichida 6 kilogramm vazn yo‘qotgan.

Dastlab futbolchi virusli infeksiya tufayli kasallangan deb taxmin qilingan edi. Biroq shanba kuni “Real” klubi rasmiy bayonot berib, tibbiy tekshiruvlar natijasida Asensioda bakterial enterokolit aniqlanganini ma’lum qildi. Hozirda 23 yoshli ispaniyalik futbolchi shifoxonadagi tekshiruvlardan so‘ng uy sharoitida davolanishni davom ettirmoqda.

Kasallik sababli Asensio jamoasiga yordam bera olmayapti. U allaqachon Chempionlar Ligasi chorak finali doirasidagi “Bavariya”ga qarshi javob uchrashuvini (3:4) o‘tkazib yubordi. Shuningdek, futbolchi La Liganing 33-turi doirasidagi “Alaves”ga qarshi bahsda ham maydonga tushmaydi. Shifokorlarning taxminiga ko‘ra, u 24 aprel kuni bo‘lib o‘tadigan “Betis”ga qarshi o‘yingacha safga qaytishi mumkin.

Ma’lumot uchun, Raul Asensio joriy mavsumda “qirollik klubi” safida barcha musobaqalar doirasida 31 ta o‘yinda maydonga tushib, 2 ta gol muallifiga aylangan.