“Manchester Siti” va O‘zbekiston terma jamoasi himoyachisi Abduqodir Husanov Angliya Premyer Ligasi 33-turidan o‘rin olgan “Arsenal”ga qarshi uchrashuvda (2:1) asosiy tarkibda maydonga tushib, to‘liq harakat qildi.
Bahs davomida Husanov 57 marta to‘p bilan muomala qildi. Himoyachi jami 42 ta uzatma amalga oshirdi, ularning 39 tasi aniq manzilga yetib bordi — 93 foiz aniqlik. U to‘rt marta uzoq masofaga to‘p oshirdi (ikkitasi aniq), shuningdek, bir marta jarima maydoni ichidan darvozaga kuchli zarba yo‘lladi. Sofascore portali o‘zbekistonlik futbolchining harakatlarini 6,8 ball bilan baholadi.
Abduqodir Husanovning himoyadagi harakatlari:
Himoyaviy harakatlar — 10 marta
Raqib hujumini qaytarib qolish — 3 marta
To‘pni qaytarib olish — 4 marta
Tozalash — 5 marta
Raqib zarbasiga blok qo‘yish — 1 marta
Yerdagi kurash — 1 marta (muvaffaqiyatli)
To‘pga tashlanib olib qo‘yish — 1 marta (muvaffaqiyatli)
Havodagi kurash — 4 marta (2 tasi muvaffaqiyatli)
“Manchester Siti”ning birinchi goliga mualliflik qilgan Rayan Sherki o‘yinning eng yaxshi futbolchisi deb topildi — 8,4 ball. Chap qanot hujumi va himoyada faol bo‘lgan Niko O’Raylining harakatlari — 8,2 ball, “shaharliklar”ning ikkinchi golini kiritgan Erling Holand hamda chap qanot hujumchisi Jeremi Dokuning ko‘rsatgan o‘yini 7,4 ballga loyiq ko‘rilgan. Maydon markazida ishonchli harakat qilgan Rodrifa 7,9 ball berilgan.
Uchrashuvda “Manchester Siti” 2:1 hisobida g‘alaba qozonib turnir jadvalida 67 ochko bilan ikkinchi pog‘onani egallab turibdi. Pep Gvardiola boshqaruvidagi jamoa peshqadam “Arsenal”dan uch ochkoga ortda qolmoqda. Biroq, “shaharliklar” hisobida bitta qo‘shimcha o‘yin mavjud.
“Shaharliklar” navbatdagi uchrashuvini 24 aprel kuni APL 34-turi doirasida “Byornli”ga qarshi o‘tkazadi.
