«Manchester Siti» bosh murabbiyi Xosep Gvardiola «Arsenal»ga qarshi bahsda Niko O’Raylining ko‘rsatgan o‘yiniga qoyil qoldi. Premyer-liga chempionligi uchun to‘g‘ridan-to‘g‘ri raqobatchilar o‘rtasidagi uchrashuv «shaharliklar»ning 2:1 hisobidagi g‘alabasi bilan yakunlandi.

O‘yindan so‘ng jurnalistlar bilan suhbatda «Siti» ustozi chap qanot himoyasida moslanuvchan rolda harakat qilgan O’Raylining o‘yinini alohida e’tirof etdi.

«U aql bovar qilmas darajada o‘ynadi — himoyada ham, hujumda ham, standart vaziyatlarida ham. Qanday futbolchi o‘smoqda! U turli pozisiyalarda birdek yaxshi harakat qiladi. Bugun u hamma narsani a’lo darajada uddaladi, sovuqqonlik saqladi va ikkinchi golning hammuallifiga aylandi. Qanday ajoyib mavsum! Uni yilning eng yaxshi futbolchisi deb atash mumkinmi, bilmadim-u, lekin eng yaxshi yosh futbolchisi ekani aniq! Bu sovrinni unga topshiravering!» — deya maqtadi ispaniyalik mutaxassis 21 yoshli O’Raylini.