«Манчестер Сити» бош мураббийи Хосеп Гвардиола «Арсенал»га қарши баҳсда Нико О’Райлининг кўрсатган ўйинига қойил қолди. Премьер-лига чемпионлиги учун тўғридан-тўғри рақобатчилар ўртасидаги учрашув «шаҳарликлар»нинг 2:1 ҳисобидаги ғалабаси билан якунланди.
Ўйиндан сўнг журналистлар билан суҳбатда «Сити» устози чап қанот ҳимоясида мосланувчан ролда ҳаракат қилган О’Райлининг ўйинини алоҳида эътироф этди.
«У ақл бовар қилмас даражада ўйнади — ҳимояда ҳам, ҳужумда ҳам, стандарт вазиятларида ҳам. Қандай футболчи ўсмоқда! У турли позицияларда бирдек яхши ҳаракат қилади. Бугун у ҳамма нарсани аъло даражада уддалади, совуққонлик сақлади ва иккинчи голнинг ҳаммуаллифига айланди. Қандай ажойиб мавсум! Уни йилнинг энг яхши футболчиси деб аташ мумкинми, билмадим-у, лекин энг яхши ёш футболчиси экани аниқ! Бу совринни унга топшираверинг!» — дея мақтади испаниялик мутахассис 21 ёшли О’Райлини.
