Madridning «Real» klubi bosh murabbiyi Alvaro Arbeloa jamoaning Ispaniya chempionati va Yevropa maydonlaridagi ishtiroki borasida o‘z mulohazalarini bildirdi.

Mutaxassisning fikricha, so‘nggi yillarda jamoaning ichki chempionatdagi natijalari barqaror emas va bu borada isloh qilinishi lozim bo‘lgan jihatlar mavjud.

— So‘nggi oylar davomida kuchli raqiblarga qarshi muhim bahslarda ancha yaxshi o‘yin namoyish etdik. Biroq nisbatan kuchsiz jamoalar bilan bo‘lgan uchrashuvlarda oqsash kuzatilmoqda. Oxirgi uch oylik natijalarga nazar tashlasak, o‘yinimizni kuchaytirish uchun imkoniyatlar yetarli ekanligini ko‘rish mumkin, — dedi murabbiy.

Shuningdek, Arbeloa La Ligadagi hakamlik va kutilmagan vaziyatlarga to‘xtalar ekan, kutilmagan bayonot bilan chiqdi:

— «Jirona»ga qarshi bahsda yuzaga kelgan vaziyatlarni inobatga olsak, «Real» uchun La Ligaga qaraganda Chempionlar Ligasida g‘alaba qozonish osonroqdek tuyulmoqda. Bu holat ko‘p narsadan dalolat beradi, — deya qo‘shimcha qildi u.

Eslatib o‘tamiz, joriy yilning 10 aprel kuni La Liga doirasida kechgan «Real» va «Jirona» (1:1) uchrashuvida bahsli vaziyat yuzaga kelgan edi. O‘yinning 88-daqiqasida Kilian Mbappe raqib jarima maydoni ichida yiqitilgan bo‘lsa-da, bosh hakam Xavyer Alberola Roxas mezbonlar foydasiga penalti belgilamagan edi.