Ispaniya Kubogi finali doirasida kechgan «Real Sosyedad»ga qarshi bahsdan so‘ng Madridning «Atletiko» klubi a’zolari Ademola Lukman va Aleksandr Syorlotning sog‘lig‘ida muammolar yuzaga keldi. Bu haqda klub rasmiy sayti xabar bermoqda.

Ma’lum qilinishicha, har ikki futbolchi uchrashuvni yomon jismoniy holatda yakunlagan. Klub tibbiy xizmati tomonidan o‘tkazilgan tekshiruvlar natijasida futbolchilarda jarohat olish xavfi mavjudligi aniqlangan. Shu sababli shifokorlar ularga ehtiyot choralarini ko‘rishni tavsiya etgan.

«Ademola Lukman va Aleksandr Syorlot tibbiy ko‘rikdan o‘tkazildi. Jarohat xavfini oldini olish maqsadida yaqin kunlarda ular asosiy guruhdan alohida tarzda, individual reja asosida mashg‘ulot olib borishadi. Futbolchilarning umumiy guruhga qaytish muddati ularning sog‘lig‘i tiklanishiga qarab belgilanadi», — deyiladi klub rasmiy bayonotida.

Eslatib o‘tamiz, Ispaniya Kubogining final bahsi «Atletiko» va «Real Sosyedad» jamoalari o‘rtasida kechib, asosiy vaqt 2:2 hisobida yakunlangan edi. Penaltilar seriyasida esa 3:4 hisobida «Real Sosyedad» g‘alaba qozongan.