«Milan» va «Sampdoriya» klublarining sobiq yulduzi, niderlandiyalik afsonaviy futbolchi Ruud Gullit Italiya futbolida kuzatilayotgan muammolar yuzasidan o‘z fikrlarini bildirib o‘tdi.
Gullitning ta’kidlashicha, A Seriyadagi muvaffaqiyatsizliklar ayrim mahalliy ekspertlar ta’kidlaganidek, chempionatda legionerlar sonining ko‘pligi bilan bog‘liq emas.
— Ilgari ham A Seriyada chet ellik futbolchilar ko‘p bo‘lgan, biroq bu Italiya terma jamoasiga eng yuqori maqsadlarni amalga oshirishga xalaqit bermagan. Menimcha, hozirgi asosiy muammo himoya chizig‘ida. Italiya futboli doimo hujumlarni yaxshi boshlay oladigan va ularga yordam beradigan kuchli himoyachilar bilan ajralib turgan. Hozirda jamoalarda Kyellini yoki Bonuchchi kabi mahoratli himoyachilar yetishmayapti. Shu bilan birga, yuqori darajadagi hujumchilar taqchilligi ham sezilmoqda, — dedi Gullit.
