PRO-Liga 4-turi doirasida «Metallurg» – «BuxDU» (3:0) uchrashuvi bo‘lib o‘tdi. O‘yindan keyin bekbodliklar bosh murabbiyi matbuot anjumanida ishtirok etdi.

— «Chiroyli g‘alabaga erishdik. Bu bilan jamoamiz a’zolarini va bekobodliklarni tabriklayman. Futbolchilarimizning o‘yini turdan turga ochilib boryapti. Bugun biz murabbiylar xohlagan futbolni namoyish etib, chiroyli g‘alabaga erishdik.

Hozir PRO-Ligada ham xuddi Superliga kabi "boksing dey" ketyapti. Tez-tez maydonga tushyapmiz. Futbolchilarga dam berish maqsadida ikkinchi bo‘limda ayrim futbolchilarni zaxiraga oldik, chunki keyingi bahsni safarda «Paxtakor farm»ga qarshi o‘tkazamiz. U ham muhim o‘yin bo‘ladi.

Tanaffusda yigitlarga to‘pni nazorat qilish kerakligini aytdim. Hisob 2:0 dan keyin xotirjamlikka berilib, hujum chizig‘imizda tezlik yo‘qoldi.

«Sho‘rtan», «Kattaqo‘rg‘on» qatori «Aral» bilan «Mobiuz» oldiga ham aniq vazifa qo‘yilganidan xabardamiz. Biz uchun har bir bahs finaldek o‘tyapti. Ayni damda bor e’tiborimiz «Paxtakor farm»ga qaratilgan.

O‘yindan keyin klubimiz prezidenti kiyim almashtirish xonasiga kirib, g‘alaba bilan tabrikladilar va futbolchilarga motivasiya berdilar. Klub rahbarining bunday qo‘llab-quvvatlashi jamoaga katta ruhiyat beradi. Bundan biz murabbiylar ham, jamoamiz a’zolari ham nihoyatda xursandmiz» — dedi Ilhom Mo‘minjonov.