«Barselona» hujumchisi Robert Levandovskining agenti Pini Zaxavi yaqin kunlarda klub rahbariyati bilan uchrashib, futbolchining shartnomasini uzaytirish masalasini muhokama qiladi. Bu haqda Mundo Deportivo xabar bermoqda.

Manbaga ko‘ra, Zaxavi "Barselona"ga mijozi uchun uning maqomi va darajasiga mos taklif olish maqsadida kelmoqda.

Ma’lum qilinishicha, mavsum davomida «Barselona» futbolchiga shartnomani 2027 yil yozigacha uzaytirishni taklif qilgan. Levandovski bunga rozilik bildirgan, ammo moliyaviy shartlar bo‘yicha tomonlar hali kelishuvga erisha olmagan. Shu bilan birga, klub avvalgi taklifga nisbatan maoshni kamaytirish variantini ham ko‘rib chiqmoqda va muzokaralarda asosiy e’tiborni futbolchining jamoadagi roli hamda o‘yin vaqtiga qaratgan.

Levandovskiga boshqa klublar, jumladan, «Chikago Fayr», Saudiya Arabistoni klublari, shuningdek «Yuventus» va «Milan» ham qiziqish bildirmoqda. Biroq polshalik hujumchi uchun asosiy ustuvorlik «Barselona»da qolish hisoblanadi.

Hozirgi shartnoma kelasi yozgacha amal qiladi. Eslatib o‘tamiz, Levandovski 2022 yilda «Bavariya»dan «Barselona»ga o‘tgan. Joriy mavsumda u 40 ta o‘yinda ishtirok etib, 17 ta gol urdi va 3 ta golli uzatma berdi.