«Manchester Siti» darvozaboni Jeyms Trafford klubdagi bir mavsumlik faoliyatidan so‘ng jamoani tark etishi mumkin.

Florian Plettenbergning ma’lumotlariga ko‘ra, 23 yoshli ingliz posboni muntazam o‘yin amaliyotiga ega bo‘lish maqsadida jamoadan ketishga tayyor. «Shaharliklar» esa uni saqlab qolmoqchi.

Trafford bir qator ingliz klublarining qiziqishlari doirasiga tushgan. Xususan, «Brayton» agar niderlandiyalik Bart Verbryuggenni sotib yuborsa, uning o‘rniga ideal nomzod sifatida aynan Traffordni ko‘rmoqda.

Eslatib o‘tamiz, Jeyms o‘tgan yozda «Bernli»dan 27 million funt evaziga sotib olingan edi. Uning transferidan so‘ng «Siti» «PSJ»dan Janluiji Donnarummani o‘z safiga qo‘shib oldi va aynan italiyalik posbon jamoaning asosiy darvozaboniga aylandi.

Trafford barcha musobaqalarda 14 ta o‘yinda maydonga tushdi (APLda bor-yo‘g‘i 3 ta o‘yin), o‘z darvozasidan 10 ta to‘p olib chiqdi va 7 ta o‘yinda «quruq» seriya qayd etdi. Shuningdek, u klub bilan birgalikda Angliya liga kubogi sohibiga aylandi.