Madridning «Real» klubi bosh murabbiyi Alvaro Arbeloa jamoaning sobiq ustozi Fabio Kapello tomonidan yangragan tanqidlarga javob qaytarmaslikni lozim topdi.
Avvalroq italiyalik mashhur mutaxassis «qaymoqranglilar»ning muvaffaqiyatsizliklariga yarim himoyadagi muammolar sabab ekanini, jamoa Luka Modrich va Toni Kroos ketganidan keyin kuchsizlanib qolganini ta’kidlagan edi.
«Kapelloning muammolarimiz haqida aytgan gaplari? Men hamkasbimning fikrlariga izoh bermayman», — dedi Arbeloa «Alaves» ustidan qozonilgan g‘alabadan (2:1) keyingi matbuot anjumanida.
Eslatib o‘tamiz, ispaniyalik mutaxassis joriy yilning yanvar oyida iste’foga chiqarilgan Xabi Alonsoning o‘rnini egallagan edi. Ayni damda madridliklar La Liga turnir jadvalida «Barselona»dan 6 ochkoga ortda qolmoqda, vaholanki kataloniyaliklarda bitta zaxira o‘yini mavjud.
Shuningdek, «Qirollik klubi» yaqinda Chempionlar ligasi chorak finalida «Bavariya»ga imkoniyatni boy berib, musobaqadagi ishtirokini yakunlagan edi.
