Мадриднинг «Реал» клуби бош мураббийи Альваро Арбелоа жамоанинг собиқ устози Фабио Капелло томонидан янграган танқидларга жавоб қайтармасликни лозим топди.

Аввалроқ италиялик машҳур мутахассис «қаймоқранглилар»нинг муваффақиятсизликларига ярим ҳимоядаги муаммолар сабаб эканини, жамоа Лука Модрич ва Тони Кроос кетганидан кейин кучсизланиб қолганини таъкидлаган эди.

«Капеллонинг муаммоларимиз ҳақида айтган гаплари? Мен ҳамкасбимнинг фикрларига изоҳ бермайман», — деди Арбелоа «Алавес» устидан қозонилган ғалабадан (2:1) кейинги матбуот анжуманида.

Эслатиб ўтамиз, испаниялик мутахассис жорий йилнинг январь ойида истеъфога чиқарилган Хаби Алонсонинг ўрнини эгаллаган эди. Айни дамда мадридликлар Ла Лига турнир жадвалида «Барселона»дан 6 очкога ортда қолмоқда, ваҳоланки каталонияликларда битта захира ўйини мавжуд.

Шунингдек, «Қироллик клуби» яқинда Чемпионлар лигаси чорак финалида «Бавария»га имкониятни бой бериб, мусобақадаги иштирокини якунлаган эди.