Angliya Premyer-ligasining 34-turidan o‘rin olgan dastlabki uchrashuvda «Brayton» o‘z maydonida Londonning «Chelsi» klubini yirik hisobda mag‘lub etdi.
Mazkur muvaffaqiyatda jamoaning tajribali hujumchisi Danni Uelbek ham katta hissa qo‘shdi. Veteran futbolchi maydonga faqatgina 82-daqiqada tushirilgan bo‘lsa-da, uchrashuvdagi yakuniy — uchinchi golga mualliflik qilishga ulgurdi.
O‘yindan so‘ng Uelbek o‘z fikrlari bilan o‘rtoqlashdi:
«Erta urilgan gol jamoaga katta yordam berdi. Umuman olganda, barcha futbolchilar maydonning har bir qarichida, har bir duelda xuddi sherlardek jang qilishdi. Bu haqiqatan ham juda kuchli o‘yin bo‘ldi. Bundan tashqari, darvozamiz daxlsizligini saqlab qolganimiz ham muhim ahamiyatga ega», — deya Uelbekning so‘zlarini keltiradi BBC Sport.
Ushbu g‘alabadan so‘ng «Brayton» turnir jadvalida «Chelsi»dan o‘zib ketdi. Ayni damda londonliklar 48 ochko bilan 7-o‘ringa tushib qolgan.
