Англия Премьер-лигасининг 34-туридан ўрин олган дастлабки учрашувда «Брайтон» ўз майдонида Лондоннинг «Челси» клубини йирик ҳисобда мағлуб этди.

Мазкур муваффақиятда жамоанинг тажрибали ҳужумчиси Данни Уэлбек ҳам катта ҳисса қўшди. Ветеран футболчи майдонга фақатгина 82-дақиқада туширилган бўлса-да, учрашувдаги якуний — учинчи голга муаллифлик қилишга улгурди.

Ўйиндан сўнг Уэлбек ўз фикрлари билан ўртоқлашди:

«Эрта урилган гол жамоага катта ёрдам берди. Умуман олганда, барча футболчилар майдоннинг ҳар бир қаричида, ҳар бир дуэлда худди шерлардек жанг қилишди. Бу ҳақиқатан ҳам жуда кучли ўйин бўлди. Бундан ташқари, дарвозамиз дахлсизлигини сақлаб қолганимиз ҳам муҳим аҳамиятга эга», — дея Уэлбекнинг сўзларини келтиради BBC Sport.

Ушбу ғалабадан сўнг «Брайтон» турнир жадвалида «Челси»дан ўзиб кетди. Айни дамда лондонликлар 48 очко билан 7-ўринга тушиб қолган.