Madridning «Real» klubi markaziy himoyachisi Eder Militao La Liga doirasidagi «Alaves»ga qarshi bahsda navbatdagi jarohatini oldi.
Uchrashuvning birinchi bo‘limi yakunlanib borayotgan bir vaqtda jamoa bosh murabbiyi Alvaro Arbeloa braziliyalik futbolchini majburiy ravishda Antonio Ryudigerga almashtirishga qaror qildi. Ispaniya OAVlarining xabar berishicha, Militao yana tizzasidan jarohat olgan. Hozircha jarohatning qay darajada jiddiy ekani va futbolchining tiklanish muddatlari haqida aniq ma’lumotlar yo‘q.
Eslatib o‘tamiz, 28 yoshli himoyachi mushaklaridagi muammolar sababli o‘tgan yilning dekabr oyidan shu yilning aprel boshigacha maydonga tusha olmagan edi.
Ma’lumot uchun, Eder Militao joriy mavsumda «qaymoqranglilar» safida 22 ta o‘yinda ishtirok etib, 2 ta gol va 1 ta golli uzatmani o‘z hisobiga yozdirib qo‘ygan.
