«Manchester Yunayted» sobiq sardori Brayan Robson jamoa boshqaruvini vaqtinchalik o‘z qo‘liga olgan Maykl Kerrikning faoliyati haqida fikr bildirdi.

«Menimcha, Maykl hozirgi vaqtda ishni a’lo darajada uddaladi. U jamoani qabul qilib olgan nuqta bilan hozirgi holatni solishtirsak, katta farqni ko‘ramiz. Endi Kerrikning oldida bitta vazifa bor — boshlagan ishini oxiriga yetkazish va jamoani Chempionlar ligasiga olib chiqish. Agar u buni uddalasa, «Manchester Yunayted» unga kamida ikki yil imkoniyat bermasligi uchun birorta sabab ko‘rmayapman», — dedi Robson.

Afsonaviy futbolchi ingliz mutaxassislariga katta klublarda kam imkoniyat berilishini tanqid qilar ekan, jamoa tarkibiga ham to‘xtalib o‘tdi:

«Men doim aytganman: agar buyuk jamoa tuzmoqchi bo‘lsangiz — buyuk o‘yinchilarni sotib oling. O‘rtamiyona jamoa uchun o‘rtamiyona futbolchilar kifoya. Agar tarkibga kuchsiz ijrochilarni yig‘sangiz, APLdan tushib ketasiz».

Ma’lumot uchun, Maykl Kerrik yanvar oyida Ruben Amorim iste’fosidan so‘ng jamoani qabul qilib olgan edi. Uning qo‘l ostida «qizil iblislar» sezilarli darajada o‘sishga erishdi. Ayni damda «Manchester Yunayted» APL turnir jadvalida 33 turdan so‘ng 58 ochko bilan 3-o‘rinda bormoqda va YECHL yo‘llanmasi uchun asosiy da’vogarlardan biri bo‘lib turibdi.